Gschichtla

Sele moi

Sele moi, wei ma noch san Buama gwest, homma se amoi in da Leitn gschpüt.
D Birkla san grod grej worn, d Himmlschlissln hom blejht und Sunna hot gscheint.

Mei Goot! So sche hot d Sunna mei Lebatoch nimma gscheint,
so sche san d Bleimla mei Lebatoch nimma gwest, wie selle moi.

I waß no wei hait. Iba d Wiesn is a Schmetterling gflogn, a ganz a geler
und i hob na fonga wölln, ober er is ibers Bechl ibere gflogn und furt is
a gwest und i hob ihm nougschaut wei an valoren Glick.

O je! Seit dem san ma gor vü Schmetterlinga zflogn,
gor monem Glick hob i nougschout! - - - -

Weg is gwest. Ibers Bechl is gflogn!
Und eitz ? Eitz wenn ma wieda amoi so a Schmetterling zoufleigt und i heit na gern,
muß i an den Toch denkn, wei ma sele moi in da Leitn gspült, wei da Birkla san grei worn
und Himmelschlissln bleiht hom.

Jo un d eitz waß i, wei`s is :
es gibt ka Glick net in da Wöit, wo net a Bechl dabei wat. Jo !

Do fleigts driba. - - - - - - - - - - Gsigst as !  Weg is !
Und wenn`s das no so gern heitst, ibers Bechl is gflogn. Jo, ibers Bechl.

's Glick is hoit a Schmetterling.

Zwa Faule

Dou san amoi a Vota und a Suh gwest. Dei san a so faul gwest.
D Leit vo weit und brat san schaun kumma. Am leibastn sans af
da Bank firn Haus in da Sunna gseen und hom Gfreifn graucht.
Gredt homs net vü. oba moingsmoi is dan Buam wos oigfoin und
don hots dan Votan gfrogt, so wie heit ach:
"Vota" sogt a " mit da rechtn Hond"?, sogt a " hoit ma Gfeifn
- oba af wos hot ma a linke Hond" ?

Da Vota schaut den Buam grouß o und nouchan sogt a:

"Tepp du - doß ma se in Orsch krotzn ko" .

Von an Geizkrogn

Da Friedl is fir an Geizkrogn in gonzn Dorf bekonnt, dass a oba sein Geiz grod am Schoulmasta ausgeh loußt, is net sche va ehm. Mißts nemle wissn, doss dei Gschicht noch von sellemoi is, wou d Schoulmastan noch san Glocknleitn und mistriern gong und vo den glebt hom, wos ehna d Leit ins Haus gschickt hom. Da Friedl hot dan Lehra nei nix gschickt, net amoi a Wirschtl von Sautonz. Des hot dan Schulmasta vadrossn. Is ach net grod sche gwest von Friedla. Oba so san hoit d Leit! Und da Schoulmasta hot se virgnumma, doss a dan Friedl amoi freng wird, wos a gega ehm hot.
Richte trifft an am ondarn Toch af da neia Strouß und hebt glei o:
"Friedl, wos hob i da too? Schau, i bi a orma Schoulmasta. Olle schickn ma wos..."
Oba, oba, i hobs nur vagessn. Grod nur vagessn, Schoulmasta", sogt da Friedl und locht. " Wasst wos? Morgn schick i da a gonze Sau!" Wei da Schoulmasta des hert, vagibt da dan Friedl olle Sintn, reibt se d Händ und rennt ham, seina Oitn zan dazöihln, wos fir a noblicha Kabalier da Friedl is - - o gonze Sau !
Am ondan Toch wort da Schoulmasta.    --- Nix!
Er wort a Wochn.  -  -  -  -  -  - - Nix!
Er wort vierze Tech. -  -  -  -  -  -  - -  -  -  -  -  -  -  Nix !
Nouch an Monat trifft da Schoulmasta dan Friedl wieda:
" No Friedl, wos isn mit dera Sau?"
" Derfst net grante san, Schoulmasta, i heit das jo gern gschickt, ob jetzt frisst se wieda."
Des hot da Schoulmasta glaum eigseng und ois is ban oitn bliem.

in Iglauer Mundart von Hubert Nerad
ergänzt am 24.12.2003